1Cor 3 | BEF | STEP | Nigibo nalalu'nigitabe. Ya'ma kaga lu lepi'ohuna'mu nani lenalitoga ma melugu bona'i kehelise'na'ani hiti lu epilata nohuna'a ana suhi huto lepi'ohube. Lenali mono kagu amuya memelese Kilisitohi lagaso yagapana'i inapu tegi hite nehago nani Hu'mamofihi Sikalafu'a hiti menehana'a lu epilatamofihi ya'ma lu lepi'ohube.

1 Corinthians 3

Bona'i Hu'mamofihi foyalo bona'a lolo hite nehana

1 Nigibo nalalu'nigitabe. Ya'ma kaga lu lepi'ohuna'mu nani lenalitoga ma melugu bona'i kehelise'na'ani hiti lu epilata nohuna'a ana suhi huto lepi'ohube. Lenali mono kagu amuya memelese Kilisitohi lagaso yagapana'i inapu tegi hite nehago nani Hu'mamofihi Sikalafu'a hiti menehana'a lu epilatamofihi ya'ma lu lepi'ohube. 2 Nani komopatinimofihi amuya nose'na melepise fa'mene amipo lepi'ohunamo tegi huto ni'ibe. Komopatinimofihi amuya nose'na ya'ma hiya hite nalabe? To lenali yatai ya'ma nose'na amuya nalana bona'magihi legegeto menehabe. Lagaso yagapana tegi hite neminabe. 3 Lenali koyapa'i mine'ahana legegeto fa'mene nehabe. Lenali ai siko higo ai siko higo nehite luba sabo hite fa'mene bona tegi hite mine'ahana suhi hite ya'ma hapa'amofihi huto huto ni'igo koyapa lenemehiti minelata nehabe. 4 Lenali luga'amagi Poluhi bona'a nohune lite nelago to luga'amagi Apolosihi bona'a nohune lite nelana bona'i ya'amagita lenali kumu fa'mene melugu bona'i suhi hite nehabe luto lu lepalaluna'mu yabe.

5 Lenali lali'i henabe lite loko hilata nehabe. Apolosi hiti Polu hiti le'ali fa'mene Hu'mamofihi koko pana'amale'ita Sipi Bouba lilina ka lu le'eto'ehina'a huto ka lu lepito nohu'igo ai kumu agoya hu emi'ahanamo ni'ibe. Hu'mau le'emi'ehina lili'na lilu'ina ni'ibe. 6 Bigaha'a nani'ni lito kofo'ohuna ya'ma suhi huto nani folagahatinigu lili'na hapi fi'ohuna. Apolosiu ai bigaha'alo nagami'i hekito ligilata Hu'mau ya'ma lusa agigo legeya'a holata nohibe. 7 Ya hu'ehina'mu lito kofolata nohina bo ai kumu melilune to nagami'i ligilata nohina bo ai kumu meliluta ni'inaya lusa gigo legeya'a le'mo holata nohina bo Hu'mamofihi ai moneko kumu lilune. 8 Lito kofolata nohuna to nagami'i ligilata nohina le'ali moneko legegeto nohu'ibe. Mina'a ya'ma lili'na li'ohu'ina legegeto eto eto huto lilu'ina'mu yabe. 9 Le'ali Hu'mamofihi lili'nalo bo'a nohu'ibe. Hu'mamofihi foya'a lenaliya nehabe.

To mone hiti fono ka luto lenali Hu'mamofihi nohi hepa'a lolo hite nehabe. 10 Hu'mau lili'na nimi'ehina'mu luto nani nohi gise'namofihi lamana'a ufe'ye yafa lukesa lito fi'ohuna. To anamofihi gupisalo bona'i luga'amagi molo emite nohi gilata nehabe. Lukesa fugo mino'ehina ya'ma Yesu Kilisito yabe. Ya'ma li sigito mone fato lukesa aku'i filana'a meni'ibe. Yana'mu nohi neginamagi keheli fe lite minete kaba hite gilabe. 12 To lukesa yamofihi gupisalo moneuba goli efahi yatufi, to siliba efatufi, to mina'a tito nina efatufi, to helebole yafatufi, to akepatufi kifinatufi gilina yamofihi minoto nohi gi'ehina ya suhi huto hapa'a huto hilube'mu hibe. 13 Minoto Kilisitohi Sipi Yupahi alina kanagu hapa'a huto hilina'mu yabe. Ya nehinogo logo sipi i kulu tilube'mu hibe. To ana logouba nohi negite lili'na li'ahanamofihi hapa'a li huto hilina'mu yabe. 14 Bo moneuba lukesamofihi gupisalo nohi gi'ehina ana logouba lo su mehalinagi fa'mene minalina yamofihi ai'a mina'a lilina'mu yabe. 15 To bo moneuba nohi gi'ehinamofihi lili'na logouba lo su ho etalina yamofihi ai mina'a melilina'mu yabe. Ai lili'na lito gi'ehina Kilisitou li fekilito to ana bomo logoguti buto bilina'mu yabe.

16 Lenali ya'ma Hu'mamofihi sipi mono noha'a nehabe to Hu'mamofihi Sikalafu'uba komopatinigu minoto nohina yamofihi mekeheli'ahafihe? Ya'ma lenali akeheli'ahana. 17 Hu'mamofihi noha'a ya'ma eto huto ni'ibe. To ai noha'a ya'ma lenali nehanagihe. Luga'amagi enali Hu'mamofihi sipi noha'a li sibina hilanamofihi Hu'mau ai'a ana suhi huto ana bona'i enele'mo sibina hilina'mu yabe. Ya'ma lenele'mo sibina hilana bona'magihi Hu'mau enele'mo sibina hilina ni'ibe.

18 Lenali komopatini keheli sibina mehilo. Lenalitogati moneuba nani ma melugu bona'magihi kehelise'na'ani bati huto li'ohuna bo nohube luto lilina ya'ma ai kehelise'na'a he'mito bona'magihi enubulo kehelise'na bati mehina bo lolo huto minalibe. Henabe lutobe? Ai ya hulenogo lusi kehelise'na Hu'mamofitogati lilibe luto yabe. 19 Metoga bona'magi kehelise'na'ani yamofihi Hu'mau kehelinogo legeya'a lolo mehilina'mu yabe. Ya hu'ehina mono bukugu Hu'mau kumu kaga mone ma lite fayahi keye'ahanamo ni'ibe:Hu'mau ai enali keheli fe lu'ohune lite ana'ina neligo kofohi nemele epalago kofohi molo'ehinagu ananamofihi bagagu enele'mo buto nohibe. 20 To fayahi keye'ahana mone hiti ma huto ni'ibe:Sipi Bouba enali keheli fe lite nohuta bo nohune lite nelina bona'magi enegekesa kehelilata nehana ka ya'ma fa'menena lolo hulata nohibe luto Sipi Bouba keheli'ehibe. 21 Ya hu'ehina'mu lenali bona'magihi enugufa le'mo lite metilo. Ana'ina silaga nasana lenali kumu yabe luto Hu'mau molo lepolo'ehinamo ni'inagihe. 22 Nani Poluita to Apolosi to Pita lali ya'ma lenali kumu yabe luto kaba he'mi letago nohune. To melugu nasana silaga'i to minolatanafi fililatana to yatai ni'ina nasana alihi huto hilina nasanamofihi silaga'i lenali nasana ni'ibe. 23 To lenali ya'ma Kilisitohi bona'a nehabe. To Kilisito ya'ma Hu'mamofihi pana'a nohibe.